सापटी तिर्न अपहरणको नाटक

क्लिक काभ्रे

२०७९ माघ २५, बुधबार मा प्रकाशित १0 महिना अघि

१०१ पाठक संख्या

काठमाडौंको चन्द्रागिरी नगरपालिका वडा नं १३ स्थित अपहरणमा परेको भनेर झुक्याउँदै रकम असुली गर्न खोजेको आरोपमा ६ जना पक्राउ परेका छन् ।

पक्राउ पर्नेमा काभ्रेका काभ्रेका ४२ वर्षीय जगतबहादुर भोलान, काभ्रेका ५३ वर्षीय कान्छामान जिम्वा, काठमाडौंका ४७ वर्षीय बिदुर बस्नेत, चितवनका ३३ वर्षीय दिलिप बिक, सर्लाहीका ४७ वर्षीय भोला महतो नुनिया, र धादिङका ४४ वर्षीय आशमान लामा पक्राउ परेका हुन् ।

पक्राउ पर्ने ६ जनालाई नै अहिले प्रहरीले नियन्त्रणमा लिएर थप अनुसन्धान गरिरहेको महाशाखाका सूचना अधिकृत प्रहरी उपरीक्षक सोमेन्द्रसिंह राठौरले बताए ।

प्रहरीका अनुसार उनीहरूले पैसा असुली गर्ने उद्देश्यले आफूहरू अपहरणमा परेको भन्दै परिवारका सदस्यहरूलाई नै भ्रम छरेका थिए । तर परिवारका सदस्यहरूले प्रहरीकहाँ उजुरी दिएपछि घटनाको खुलासा भएको प्रहरीले जनाएको छ ।

घटना के हो ?

चन्द्रागिरि नगरपालिका१३ का विदुर बस्नेतले काभ्रेका जगतबहादुर भोलान, कान्छामान जिम्बा र आशमान लामालाई १० लाख रुपैयाँ सापटी दिएका थिए । तर उनीहरुले पैसा तिर्न सकेका थिएनन् ।

मंगलबार विदुर, जगतबहादुर, कान्छामान र आशमान पुरानो नैकापस्थित पिस ब्याम्बो रिसोर्टमा बसेका थिए । त्यहाँबाट जगतबहादुर, कान्छामान र आशमानले विदुरको पैसा तिर्ने उद्देश्यले आआफ्नो घरमा फोन गरी आफू अपहरणमा परेको भन्दै साढे ३ लाख रुपैयाँ लिएर आउन भनेका थिए । तर उनीहरुका पत्नीहरु पतिको अपहरण भएको भन्दै काठमाडौं उपत्यका अपराध अनुसन्धान कार्यालयमा उजुरी गर्न आइपुगेका थिए ।

एसपी राठौरका अनुसार प्रहरीले खोजी गर्दा उनीहरु पुरानो नैकापस्थित पिस ब्याम्बो रिसोर्टमा बसिरहेको फेला परेका थिए । प्रहरीले विदुर र उनीसँग लेनदेन कारोबार भएका ३ जना र रिसोर्टमा सँगै बसेका दिलिप र भोलालाई पनि पक्राउ गरेको हो । उनीहरुमाथि अभद्र व्यवहारमा अनुसन्धान सुरु गरेको राठौरले जानकारी दिए ।