बिहानको हिँडाइबाट हजारौँलाई प्रेरणा दिँदै उमेश

सराेज चाैलागाई

२०८३ कार्तिक १३, शुक्रबार मा प्रकाशित ७ घण्टा अघि

१०८ पाठक संख्या

धुलिखेल/ कुनै समय आफ्नै स्वास्थ्य समस्यासँग जुधिरहेका उमेश आचार्य अहिले हजारौँ मानिसलाई स्वस्थ जीवनशैली अपनाउन प्रेरित गरिरहेका छन्। थाइराइड रोग, बढ्दो तौल र कोलेस्ट्रोल तथा प्रि–डायबिटिजको जोखिम सामना गरेका उनले जीवनशैली परिवर्तनलाई आफ्नो प्राथमिकतामा राखे। बिहान सबेरै उठेर नियमित हिँड्ने बानीबाट सुरु भएको उनको यात्रा अहिले सामाजिक सञ्जालमार्फत स्वस्थ जीवनशैलीको सन्देश फैलाउने अभियानमा परिणत भएको छ।

काभ्रे धुलिखेलका उमेशले २१ वर्षको उमेरमै थाइराइड रोगको सामना गर्नुपरेको थियो। उपचारका क्रममा थाइराइड ग्रन्थी निकाल्नुपर्ने भएपछि उनले हाइपोथाइराइडिज्मका लागि नियमित औषधि सेवन गर्नुपर्ने अवस्था आयो। त्यसको केही वर्षपछि स्वास्थ्यसम्बन्धी चुनौती थपिँदै गए। २५ वर्षको उमेरमा उनको तौल ९७ केजी पुगेको थियो। बढ्दो कोलेस्ट्रोल र प्रि–डायबिटिजको जोखिमले उनलाई आफ्नो स्वास्थ्यप्रति थप सचेत बनायो।

स्वास्थ्यमा देखिएका यी चुनौतीबीच उनले जीवनशैली परिवर्तन गर्ने निर्णय गरे। नियमित हिँडाइ र शारीरिक व्यायामलाई दिनचर्यामा समेटे। सुरुमा सामान्य अभ्यासका रूपमा थालिएको बिहानको हिँडाइ विस्तारै उनको जीवनको अभिन्न हिस्सा बन्यो।

जाडो, गर्मी वा सामान्य वर्षा—मौसम जस्तोसुकै भए पनि उनी बिहान हिँड्ने आफ्नो बानीलाई निरन्तरता दिने प्रयास गर्छन्। नियमित शारीरिक गतिविधि र जीवनशैलीमा आएको परिवर्तनसँगै उनको तौल घट्दै गयो। अहिले उनको तौल ७४ केजी छ। उनी आफूलाई विगतको तुलनामा स्वस्थ र तन्दुरुस्त महसुस गर्छन्।
आफूले गरेको प्रयासले स्वास्थ्यमा सकारात्मक परिवर्तन ल्याएको अनुभवपछि उमेशलाई आफ्नो यात्रा अरूसँग पनि साझा गर्न मन लाग्यो। व्यक्तिगत अनुभव अरूका लागि प्रेरणा बन्न सक्छ भन्ने सोचले उनले बिहानको हिँडाइ, सूर्योदय, प्राकृतिक दृश्य र स्वस्थ जीवनशैलीसम्बन्धी भिडियो सामाजिक सञ्जालमा राख्न थाले।

सुरुवाती दिनमा उनका भिडियोले खासै प्रतिक्रिया पाएनन्। तर, उनले आफ्नो उद्देश्य छाडेनन्। निरन्तर भिडियो बनाउँदै र साझा गर्दै गए। उनको विश्वास थियो—आज थोरै मानिससम्म पुगेको सन्देश भोलि हजारौँ मानिसका लागि प्रेरणा बन्न सक्छ।

समयसँगै उनका भिडियोले दर्शकको ध्यान आकर्षित गर्न थाले। भिडियो साझा गर्न थालेको एक वर्ष नपुग्दै टिकटकमा ३३ हजारभन्दा बढी, फेसबुकमा २८ हजारभन्दा बढी र इन्स्टाग्राममा दुई हजार चार सयभन्दा बढी फलोअर जोडिएको उनले बताएका छन्। यसरी तीनवटै सामाजिक सञ्जालमा गरी ६३ हजारभन्दा बढी फलोअर उनको अभियानसँग जोडिएका छन्।

उनका भिडियोमा आउने प्रतिक्रियाले पनि दर्शकको चासो देखाउँछन्। कतिपयले बिहान हिँड्न थालेको, कतिपयले धूम्रपान त्यागेको र कतिपयले रक्तचाप तथा कोलेस्ट्रोल व्यवस्थापनमा सुधार आएको अनुभव साझा गर्ने गरेका छन्। उनका अनुसार भिडियोमा आउने प्रतिक्रिया करिब ९९ प्रतिशत सकारात्मक छन्।

उमेशले आफ्नो अभियानलाई ‘One More Step, One More Breath’ नाम दिएका छन्। यस अभियानको मूल सन्देश छ—स्वस्थ जीवनका लागि ठूलो परिवर्तनको प्रतीक्षा गर्नुभन्दा आजै एउटा सानो कदम चाल्नु महत्त्वपूर्ण छ।

हरेक भिडियोमा #OneMoreStepOneMoreBreath ह्यासट्याग प्रयोग गर्दै उनले मानिसहरूलाई बिहानको न्यानो ओछ्यान छोडेर हिँड्न, नियमित शारीरिक गतिविधिका लागि समय छुट्याउन र आफ्नो स्वास्थ्यप्रति जिम्मेवार बन्न प्रेरित गर्छन्।

उनका भिडियोमा बिहानको हिँडाइसँगै सूर्योदय, प्रकृतिका दृश्य र सकारात्मक सन्देश समेटिएका हुन्छन्। यसले उनको अभियानलाई व्यक्तिगत अनुभव सुनाउने माध्यममा मात्र सीमित नराखी स्वस्थ जीवनशैलीप्रति सचेतना फैलाउने प्रयासका रूपमा अघि बढाएको छ।

नियमित हिँडाइलाई उनले शारीरिक अभ्यासका साथै अनुशासन र आत्मपरिवर्तनको माध्यमका रूपमा लिएका छन्। व्यस्त दिनचर्या, आलस्य र समयको अभावका कारण आफ्नो स्वास्थ्यलाई प्राथमिकता दिन नसकिरहेका मानिसलाई उनी दैनिक केही समय भए पनि शारीरिक गतिविधिका लागि छुट्याउन आग्रह गर्छन्।
उमेशको अनुभवले स्वास्थ्यमा चुनौती आएपछि निराश भएर बस्नुभन्दा आफ्नो अवस्था सुधार गर्न सकिने पक्षमा ध्यान दिनुपर्ने सन्देश दिन्छ। यद्यपि, जीवनशैली परिवर्तन सबै रोगको उपचारको विकल्प भने होइन। नियमित शारीरिक गतिविधि, सन्तुलित आहार र आवश्यक आरामसँगै चिकित्सकको सल्लाहअनुसार उपचार जारी राख्नु पनि उत्तिकै महत्त्वपूर्ण हुन्छ।

उनी भन्छन्, “रोगलाई स्वीकारेर त्यसैमा सीमित हुने होइन, आफ्नो स्वास्थ्य सुधारका लागि प्रयास गर्ने हो। समयमै जीवनशैली परिवर्तन गरौँ, ताकि भविष्यमा पछुताउन नपरोस्। शारीरिक र मानसिक रूपमा तन्दुरुस्त रहन बिहानको न्यानो ओछ्यान छोडेर आफूलाई समय दिन सक्नुपर्छ।”

आफ्नो स्वास्थ्य सुधारका लागि सुरु गरेको अभ्यासले अहिले अरूलाई पनि प्रेरित गरिरहेको देख्दा उमेश आफ्नो अभियानलाई अझ विस्तार गर्न चाहन्छन्। सामाजिक सञ्जालमा जोडिएका मानिसले स्वस्थ जीवनशैलीका अभ्यास साझा गर्दै जानु र त्यसबाट थप व्यक्ति प्रेरित हुनु नै उनको अभियानको उद्देश्य हो।

रोग र स्वास्थ्यसम्बन्धी चुनौतीका बीच सुरु भएको उमेशको यात्रा अहिले सकारात्मक जीवनशैलीको सन्देश फैलाउने प्रयास बनेको छ। उनको कथा एउटा सामान्य तर महत्त्वपूर्ण विचारमा केन्द्रित छ—जीवनमा परिवर्तन ल्याउन सधैँ ठूलो निर्णय आवश्यक पर्दैन; कहिलेकाहीँ बिहान चालिएको एउटा कदम नै त्यसको सुरुवात बन्न सक्छ।